طنز شعرلر

محمدرضاشوکتی نین طنزلری

طنزلر

/**/

 

استاد کریمی مراغه ای دن

 (ساغلیغیمدا منی یاد ائت اخوی)

 

ساغلیغیمدا منی یاد ائت اخوی

من اؤلنده ن سورا جیرما یَخَوی

ساغلیغیمدا منی دیندیر دیل ایلن

گلمه ترحیمیمه تاج و گول ایلن

ساغلیغیمدا الیوی چک باشیما

یاخما بورنون زیلیغیین باش داشیما

تا وارام اوزمه الیمدن، الیوی

نه قرا گیی؛ نه اوزاد سقلووی

قوی یانیم من سنه سنده منه یان

سن منه جان دئ؛ دئییم من سنه جان

ساللاما قبریمه شالوار؛ باقووی

دایاما بؤیرومه س..؛ دا… وی

دیلیم اولسئیدی پوزاردیم تاقووی

الیم اولسئیدی کسردیم آقووی

ساغلیغیمدا قولووی بوینوما سال

گاه گاهی بو سولان کؤنلومو آل

هئچ گلیب قبریمه یاد ائتمه منی

باشیما چالما غلط فاتحه نی

قالاما شمعیله تونقار گؤ… مه

اؤلموشم؛ یاخمامیشام بال گؤ..مه

کاش گورکان قویا قبریمه دلیک

منیله دفن اولا بیر جانلی چلیک

او آداملار کی گلیر فاتحه یه

ساغلیغیمدا منه چیخمازدی اییه

اوزادئیدیم کفن آتدان چلیگی

زور وئریدیم گنلئیدی دلیگی

بابا ساغلیقدا منیم گول اوزومه

مشتری اول سؤزومه هم اؤزومه

منی تشویق ائله خلعت لریله

کؤنلومو شاد ائله دعوت لریله

نه یالان چپیکله، قه قه لریله

مرسی، احسن، یاشا، به به لریله

ائل گرک قیمت اشعاری بیله

نه یه ایراندا گؤره ک شاعیر اؤله

صنعت شعری چکیرلر فیسادا

دوشدو بازار فصاحت کاسادا

بیر غزل کی گلیر عشقیله باشا

کیم آلیر بو غزلی بیر لاواشا

سعدی، حافیظ، بابا طاهر، خیام

سحرین ائتدی ناهار، ناهارسیز آخشام

کیم گئییر اگنینه قیمتلی قبا

سالماییر چیینینه بیر تازه عبا

شهریارین آدی دیللرده گزیر

تازه حیدر بابا اللرده گزیر

بیر کیچیک ائوده گونون وئردی باشا

قالدی بیر مانقالی بیر حوققا ماشا

ای خدا وئر بیزه ده عقل و شعور

شاعری ائیله مه یک زینده به گور

 

 

نئیله سین؟

محمدرضا شوکتی الوار

 

کیمدی یوخسول دردینه دونیاده درمان ائیله سین

زندگانلیق رسمینی هر یئرده آسان ائیله سین

جاندا طاقت قالماییب دیر ای یئتن فریادیما!

آز قالیر آجلیق منی هر لحظه بئیمان ائیله سین

فر فقیرین نبضی دوشموش ور وزیرین کؤندونه

ایسته ییر جلاد کیمی هر گونده مین قان ائیله سین

گاه کسیر برقین سویون گاهی کسیر گازین اونون

گاهدا ایستیر قیش گونو مظلومو عریان ائیله سین

بعضی لر وار شهری داییم گاه قازیر گاه دولدورور

ایسته میر هئچ شهری بیر گون سلقه سهمان  ائیله سین

هاردا تاریخی اثر وار تئز ییخیب ائیلیر پاساژ

ایسته ییر تاریخیمی اعیانه قوربان ائیله سین

ایلده بایرام گلجه یین قیمت لری قاوزیر وزیر

چوخ سئویر مخلص کیمی یوخسوللار افغان ائیله سین

حضرت یوسف ایتیب دیر ای فلک آختارما چوخ

حقی دیر یعقوب کنعان دیده گریان ائیله سین

من کیمم رؤیاده فیللرلن گئده م هیندوستانا

قیرقیلار حاشا و کلّا سنگ باران ائیله سین؟

ای دومان آز وئر اذیت بیل کی آهیم تئز توتار

سنله بو داغ داشدا لین چان بیرده دیوان ائیله سین

حوسنونون قوربانییام ای یاغ تؤکن یاغ اوستونه

یارما ای گول دردینه درمانی هاردان ائیله سین

«شوکتی» ائل دردی یازماق بیل جسارت ایسته یر

بؤیله بیر سؤزلر گره ک هر یاندا طوفان ائیله سین

1382

 

 

جان آراسیندا

 

محمدرضا شوکتی الوار

 

لاب دونمادادیر قیشدا کاسیب جان آراسیندا

تیر-تیرتیتیریر،تور کیمی یورقان آراسیندا

هئی یالواریر اؤزتانریسینا یایی گتیرسین،

قیزسین جانی خرداد ایله  آبان  آراسیندا

چوخ ال له شیر آمالینا چاتسین چاتا بیلمیر

دونموش قیچی گلمیر بئله بحران آراسیندا

چیخمیریایا تاهای سالاداغلاردا«نفس کش»

چون قیشدا قالیر قارایله بوران آراسیندا

ایستیر دؤشه سین سینه سینه حاققینی آلسین

بیرده ن شیشیر اما دیلی دندان آراسیندا

بیت المالا قداره چکن چوخدورآ دوسلار

باخ فرقه سن اینسان ایله اینسان آراسیندا

اونبئش یول اؤلورموفته کفنده ن اؤتورافسوس

ساخلیر پولو آمما اتیلن قان آراسیندا

ای عدل ایلن اینصافی یادیندان چیخادان کس

گل فاصیله سال عقل ایله شیطان آراسیندا

بوش وعده لری حب کیمی قویدوم دیلیم آلتدا

سوردوم شیره سین آه ایله افغان آراسیندا

حقه دیله ایمانیله وجدانه با خین سیز!

بیرچؤپدو فیریلدیر یئکه طوفان آراسیندا

ملت اؤلور ای تانری یئتیش داده آماندیر

آز فاصیله سال دردایله درمان آراسیندا

چوخ آزتاپیلارشهرده رشوت یئمه ین کس 

دلال دولانار قندایله قندان آراسیندا

بیر تصدیقی ایتمیش شوفئره بنزیری حالیم

هئی رشوه وئریر سائیله میدان آراسیندا

سن قارقایا باخ هر نه پاریلدیر اونو خوشلور

بیلمیر ندی اما بئله عنوان آراسیندا

بهلول ایله رؤیاده قوناقلیقدا ایدیم من

یئنگیم یه دئییب سفره مستان آراسیندا

گؤزلرده دیرعقل ای عمی جان سؤیله دی بهلول

یازسن بونو قالسین هله دیوان آراسیندا

ای«شوکتی» شعرین ماشینین هر یئره سوردون

سرسم دئمیسن چرخ ایله فرمان آراسیندا


برچسب‌ها: کریمی مراغه ای, نئیله سین, جان آراسیندا, شوکتی الوارعلیا
+ نوشته شده در  جمعه بیست و دوم آذر 1392ساعت 23:49  توسط محمدرضاشوکتی الوارعلیا  |